Antti Roose, catedrático de Xestión de Recursos na Universidade de Tartu, é outra das persoas que fan posible EC4RURAL. El e o seu equipo organizaron a segunda reunión presencial do noso proxecto na cidade de Tartu a finais de setembro. Durante este encontro de dous días, tamén tivemos a oportunidade de coñecer in situ o traballo dos socios estonianos na constitución das doce comunidades enerxéticas rurais no seu país man a coa cidadanía.
Cal é o teu papel no proxecto EC4RURAL?
O meu papel é coordinar as accións do proxecto na Universidade de Tartu, así como no paquete de traballo de formación para facilitar e axudar á entrega de modelos e casos de enerxía comunitaria.
En xeral, cales son os retos que atopas nun proxecto como este e como os afrontas?
Para min, o máis importante é seguir facilitando as accións enerxéticas comunitarias para poñer en marcha os proxectos piloto en doce municipios estonianos. Estamos comprobando como o papel dos dirixentes e funcionarios municipais é fundamental para establecer o marco, os obxectivos e un fluxo de traballo coordinado. Ademais, continuamos co módulo de elaboración de plans formativos, introducindo os principios clave, elementos, obxectivos e posibles accións na planificación de comunidades enerxéticas e establecendo os novos obxectivos máis ambiciosos.
Algún reto en relación coa cooperación paneuropea e estoniana?
Efectivamente, temos diferentes antecedentes, experiencias e tamén diferentes intereses por parte dos socios. Traballamos con diversos axentes vinculados ás autoridades locais e, estes procesos de participación requiren de coñecementos profesionais e habilidades de comunicación especiais. En Estonia, mantemos o proxecto en movemento e avanzando con reunións cara a cara e por equipos para levar un ritmo similar en todas as rexións estonianas. Ademais, tendemos a harmonizar e coordinar as accións de todos os socios estonianos e as iniciativas externas no escenario en expansión das comunidades enerxéticas. No proxecto EC4RURAL debemos manter un espírito orientado aos resultados.
Cal é o aspecto máis satisfactorio do seu traballo?
Este primeiro ano de proxecto foi fundamental en canto a metodoloxías, enquisas, accións e seguimento. Gústame o traballo en equipo e a empatía cos novos compañeiros.
Desde o seu punto de vista, por que cre que proxectos como EC4RURAL son importantes para a sociedade?
As zonas rurais están diminuíndo e todos os proxectos deberían contribuír ao desenvolvemento destes territorios. No noso caso, poñendo o foco na transición enerxética liderada polas comunidades locais. A enerxía comunitaria pode abordar problemas de benestar, apagóns, pobreza enerxética, transferencia de coñecemento, etc. Durante a nosa segunda reunión anual en Tartu mantivemos un diálogo realmente enriquecedor sobre barreiras e solucións nos municipios de Elva, Alutaguse, Tori e Saku. Esas reunións e sesións de formación estaban directamente relacionadas cos plans locais sobre clima e enerxía, sobre como xustificar eses ambiciosos obxectivos e como marcar o camiño para poñer en práctica accións razoables para as instalacións enerxéticas comunitarias ao servizo da comunidade.
| EC4RURAL Bio Antti Roose (doutor en Xeoinformática pola Universidade de Tartu), ten unha ampla experiencia en ordenación do territorio, enerxía e medio ambiente. En 2001, fundou o centro local de enerxía de Rõuge. Foi asesor e xefe de equipo en múltiples estudos enerxéticos e urbanos ademais de colaborar en varias estratexias europeas, estonianas e locais, plans climáticos e iniciativas innovadoras. Tamén participou en proxectos da UE como experto e xestor de proxectos (ÁREA21, CAMS, BEA-APP etc). |
Antti Roose durante a benvida na reunión de EC4RURAL en Tartu.
